ތަރުޖަމާ: ނަބީލް
ހިންޏަކީ ދުވަހެއްގައިވެސް ނާއުންމީދުވާ އެއްޗެއް ނޫނެވެ. ހިނީގެ ފަލްސަފާއިން ހީވާގިކަމާއި މަސައްކަތްތެރިކަމާއި ހިތްވަރަކީ ކޮބައިކަން ދެނެގަންނާށެވެ!ހިނީގެ ފަލްސަފާއަކީ ކުރިއަށްދާ މަގަށް ހުރަސްއެޅުމުން އެހެން މަގެއް ހޯދުމެވެ. ހުރަހުގެ މަތިންލާފައި ނުވަތަ ދަށުން ލައިފައި ދިއުމެވެ. އެހެން ގޮތެއް ނެތިއްޔާ ވަށާލާފައި ދިއުމެވެ. ފަސްއެނބުރުމެއް ނެތެވެ.
ޢިބްރަތަކީ: ކަލޭ ހާސިލުކުރަން ބޭނުންވާ ކަމަކަށް ވާސިލުކޮށްދޭނޭ ގޮތް ހޯދުން ފަހަރެއްގައި ވެސް ހުއްޓައި ނުލާށެވެ.
ހިނީގެ ފަލްސަފާގައި ވަނީ ހޫނު މޫސުމުގައި ފިނި މޫސުމަށް ރޭވުންތެރިވުމެވެ. އެއްވެސް މޫސުމެއް ތާއަބަދު ދެމި ނޯންނާނެކަން ޔަގީންވާއިރު އެކަމާ މެދަށް ރޭވުންތެރިކަން މިސްރާބުކުރުމެވެ. ފިނިމޫސުމަށްޓަކައި ހޫނު މޫސުމުގެ މެދާ ހަމައިން ކާނާ ރައްކާކުރަން ފަށައެވެ. ވެއްޔާއި ހޫނުން އަރާމު ހޯދާއިރު ފިނީގައި ނިވާވާނޭ ގޮވައްޗާ މެދު ހަނދާން ނައްތައެއް ނުލައެވެ.
ޢިބްރަތަކީ: ކަންހިނގާ އުސޫލު ގަބޫލުކޮގެން ހުރުމާއެކު ކުރިއަށް ވިސްނާށެވެ.
ހިނީގެ ފަލްސަފާގައި ފިނީގައި ހޮރަށް ވަނަސް އިރު ހޫނާއެކު ދުނިޔޭގެ އައްޔަށް ރުޖޫއަވުން ލާޒިމެވެ. ޢިބްރަތަކީ: ކޮންމެ ވަގުތެއްގައި ވެސް އެވަގުތަކާ މެދު އެކަށީގެންވާ ގޮތުގައި އުޅޭށެވެ.
ސުވާލަކީ ހޫނު މޫސުމުގައި ފިނި މޫސުމަށްޓަކައި ހިނި ޖަމާކުރަނީ ކިހާވަރަކަށް ހޭ ނަމަ ޖަވާބަކީ އޭއްޗަށް ކުޅަދާނަވީ އެންމެ މަތީ މިންވަރެކެވެ.
ޢިބްރަތަކީ: ކަލެއަށް ކުޅަދާނަވީ އެންމެ މަތީ މިންވަރެއްގައި އަބަދުވެސް މަސައްކަތްކުރާށެވެ.
ބުނަން މިއުޅޭ އެއްޗަކީ ހިނީގެ ފަލްސަފާގައި ހިފާށެވެ!
މާޒީގައި އެލިގަނެގެން ނޯވެ ހަޔާތަށް ނުކުމެ "ސަޅިކަމެއް" ކޮށްލާށެވެ.
"އެމީހުން އެންމެން ވަނީ ވަރަށް ބޮޑު ކަމެއްގެ މައްޗަށް އިއްތިފާޤުވެފައެވެ. އެއީ ދުވަހަކު ވެސް އެއްބަޔަކު އަނެއް ބަޔަކަށް އިއްތިފާޤު ނުވުމުގެ މައްޗަށެވެ."1
އެމީހުންގެ ބަހަކީ އަބަދުވެސް އެއް ބަހެކެވެ.
އެއީ ދުވަހަކު ވެސް ކަމަކާއި އެއްބަސް ނުވުމަށް ބުނެވޭ ބަހެވެ.
އެމީހުން އެއްބައިވަންތައެވެ. އެންމެން އެއްބައި ނުވުމުގައެވެ. އެކުވެރިއެވެ. އެކަކު އަނެކަކަށް ދެކޮޅުވެރިވުމުގައެވެ. އެހެނަސް ވަރަށް ރަހުމަތްތެރިއެވެ. ސައިބުއިމާ ސުއްޓާ ބުއިމުގައެވެ.
އެމީހުންގެ ކިބައަކުން އެއްވެސް ތަފާތެއް ނުފެނުނެވެ. އެންމެން އެއްގޮތެވެ. ހަމަ އެކައްޗެކެވެ.
އެމީހުންވަނީ އެކަކު އަނެކަކަށް ބައިޢަތު ހިފާފައެވެ. ދުވަހަކުވެސް އެންމެން އެއްވެ އެކެއްގެ މައްޗަށް ބައިޢަތު ނުހިފުމަށެވެ.
އެމީހުންގެ ޚަލީފާއަކީ ޚިލާފުވުމެވެ. އަމީރަކީ ގަމާރުކަމެވެ. ރައީސަކީ އަސީރުވުމެވެ.
އެމީހުން އެންމެންނަކީ ވެސް ޖެހިލުން ކުޑަ ބައެކެވެ. ބިރުކުޑަ ބައެކެވެ. ކެރޭ ބައެކެވެ. އެމީހުންގެ ރައްޔިތުންގެ ކުރިމަތީގައެވެ.
އެމީހުންނަކީ އޯގާތެރިބައެކެވެ. ޢަދުއްވުންގެ ޅަ ދަރީންނަށްޓަކައެވެ. ރަޙުމުހުރި ބައެކެވެ. ދުޝްމަނުންގެ އަނބީންނަށްޓަކައެވެ. މަދަދުވެރިވާ ބައެކެވެ. އަނިޔާވެރިންގެ ކުރިއެރުމަށްޓަކައެވެ.
އެމީހުންނަކީ ދުރުވިސްނޭ ބައެކެވެ. ވެރިކަން ޙިމާޔަތްކުރާނޭ ގޮތާއި މެދުގައެވެ.
ސަމާލުވެ ލޯހުޅުވައިން ތިބޭ ބައެކެވެ. ގޮޑިތަކާއި މެދުގައެވެ.
އަމާނާތްތެރި ބައެކެވެ. ޚިޔާނާތްތެރިވުމުގައެވެ. ތެދުވެރިބައެކެވެ. ދޮގުހެދުމުގައެވެ.
އެމީހުންނަކީ މިނިވަނުންނެވެ. ދީނުގެ އެންމެހާ ހައްޔަރަކުންނެވެ. ދީނާއި ދުނިޔޭގެ ހަމަތަކާއި އުސޫލުތަކުންނެވެ.
(ނިމުނީ)
__________________________
(1) މިއީ ޢަރަބި ވެރިން ސިފަކުރުމަށް ޖެހެވޭ މިސާލު ބަހެކެވެ.
ފޭރާއަކީ ގަބުޅި، ކާށި ހެހުމަށްޓަކައި ކުރެދި ފަދަ ތަކެތިން ހަދާފައި ހުންނަ އެއްޗެކެވެ. މިހުންނާނީ އެއްކޮޅު ބިމަށް ޖަހާފައި އަނެއްކޮޅު ފޭއްސާ ތޫނުކޮށްފައެވެ. މި ޒަމާނުގައި ފޭރާގެ ތޫނުކޮށްފައި ހުންނަ ކޮޅު ހަދާފައި ހުންނަނީ ދަނގަޑުންނެވެ.
ފުރޯ އަކީ ލަކުޑިގަނޑެއް ކޮށާމަށާ ވައްކޮށް އޭގެ އެއްކޮޅަށް ކައްޗަށް ވާ ގޮތަށް ތިލައެއް ލައްވާފައި އޮންނަ ހަތިޔާރެކެވެ. ގިނަ މީހުން މި ހަތިޔާރު ބޭނުންކުރަނީ ރުއްގަސް ކެނޑުމަށެވެ.
ކިރުނައިގެ އެއް މާނައަކީ ކަނބުރުގޭތަކުގައި ދަނގަނޑުތަޅާ އިރު ދަނގަޑު ގަނޑު ބޭއްވުމަށްޓަކައި ބިމަށް ވައްދާފައި ހުންނަ ދަނގަޑު ގަޑެވެ. މި ނޫން ގޮތްގޮތަށް ވެސް ކިރުނަ ހެދިފައި ހުރެއެވެ. (މާލޭ ބަހުރުވައިން މިއަށް ކިޔަނީ ކިރުނު) އެވެ.
މަށަންދައްޗޭ ކިޔަނީ ދަތްބަރިއެއްހެން ހުންނަ އެއްޗެއް ދަނޑިގަނޑެއްގެ އެއްކޮޅުގައި ހަރުކޮށްގެން ހަދާފައި ހުންނަ ހަތިޔާރަކަށެވެ. މަށަންދަތި ބޭނުންކުރެވެނީ އިލޮށިފައްޗަށް ނުކުޅަދާނަ ތަންތަނުން ކުނިކެހުމަށާއި ބިމުގެ ފަސްގަނޑު އެއްވަރުކުރުން ފަދަ ކަންކަމަށެވެ.
ކަތިވަޅިއޭ ކިޔެނީ އާދައިގެ ވަޅިއަށް ވުރެ ތަންކޮޅެއް ބޮޑުކޮށް ހަދާފައި ހުންނަ ވަޅިއަށެވެ. މި ވަޅި ހަދާފައި ހުންނަނީ ލަކުޑި މުއްގަނޑަކަށް ދަނގަޑު ތިލައެއް އިންދައިގެންނެވެ. ދަރުކޮށުން ފަދަ މަސައްކަތްތަކުގައި މީހުން ވަޅިއެއްގެ ގޮތުގައި އާއްމުކޮށް ބޭނުންކުރަނީ ކަތިވަޅިއެވެ.
ކަން މިހެން ހުރިއިރު ފުރޯ، ފޭރާ، މަށަންދަތި، ކިރުނަ، ކަތިވަޅި، މި ހުންނަނީކީ ކޮމްޕިޔުޓަރުގެ ޢާއިލާއާ ހަސަބަކުން ނަސަބަކުން ތިމާގެ ކަމެއް ކީއްކުރަން ރައްޓެހިކަމެއް ވެސް ހުރި އެއްޗެއްސެއް ނޫނެވެ. ދެން އަދި އިންޓަނެޓާ މި ތަކެއްޗާ ކޮން ބެހޭކަމެއްހެއްޔެވެ؟ ނަމަވެސް ...؟ ކޮމްޕިޔުޓަރުގެ ލޭގައި އިންޓަނެޓު ދައުރުކުރަން ފެށުމާއެކު، ކޮމްޕިޔުޓަރު ބަދަލުވެގެންދަނީ ހަމަ މަތީގައިވާ ތަސްވީރާއި ދާދި އެއްގޮތަށެވެ.
އިންޓަރނެޓް! އެއީ ފޭރާއެކެވެ. ނަފުސުގެ ވަށައިގެން ލެވިފައިވާ ޖާހިލިއްޔަތު އެ ފޭރާއިން ހެހޭށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަން އެ ފޭރާއަށް މެހުނަ ނުދޭށެވެ!
އިންޓަރނެޓް! އެއީ ފުރޯ އެކެވެ. އެ ފުރޯއިން އަހަރެމެންގައިވާ ދިގުވެގެންވާ ނާތަހުޒީބު ގުޅިގުޅިން ކަނޑާ ތިރިކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމުގައި އެ ފުރޯ އިން ނުޖަހާށެވެ!
އިންޓަރނެޓް! އެއީ ކިރުނައެކެވެ. އެ ކިރުނައިގެ މަތީގައި ކާފަރުންގެ ރޭވުންތައް ތަޅާ ފިސްކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަން އެ ކިރުނައިގެ މަތީ ނުބާއްވާށެވެ!
އިންޓަރނެޓް! އެއީ މަށަންދައްޗެކެޗެވެ. އެއިން ޚިޔާނާތާއި އަނިޔާވެރިކަމުގައި މަށަންދަތި އަޅާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމުގައި އެމަށަންދަތި ނާޅާށެވެ!
އިންޓަރނެޓް! އެއީ ކަތިވަޅިއެކެވެ. އެ ވަޅިން ތަރައްޤީ ގެ މަގުތައް ކޮށާ އަލިކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމަށް އެ ވަޅިން ހަމަލާ ނުދޭށެވެ!
ލިޔުނީ: ނަބީލު
މުސްލިމަކަށް ވީތީ ތިޔަ އިސްލާމީ ބިނާއަށް އަހަރެން ފަޚްރުވެރި ވެމެވެ. އިންސާނަކަށް ވީތީ ތިޔަ އާސާރު އަހަރެން ޝަރަފުވެރިކުރަމެވެ.
އެހެނަސް، ކަލޭ ލޮލުން ދުށުމަކާއި ނުލައި، ކަލޭގެ އަޑު އެހުމަކާއި ނުލައި، ކަލޭގެ ލިޔުން ކިޔުމަކާއި ނުލައި، ބަޔަކު މީހުން ކަލެއަކީ މަގުފުރެދިފައިވާ ދީނީ އިމުން ބޭރު ކާފަރަކު ކަމުގައި ހަދައިފިއެވެ. ކަލޭގެ ނަން އިވުނަސް އެމީހުން ތިބެނީ އަޢޫޒު ކިޔަކިޔައެވެ. ދައްޖާލަކީ ވެސް ތިޔައީ ކަމުގައި ހިތަހިތައެވެ. ނަބިއްޔުންގެ ދަރީންގެ ތެރޭގައި ވެސް ނުކިޔަމަންތެރީން އުޅުނު ކަމެއް އެމީހުންނަކު ނުދަނެތެވެ.
އަނެއް ބަޔަކު، ކަލޭގެ ފިކުރާއި ބުއްދިއާއި، ގޮތާއި މަންހަޖާ، ހިރަފުހާ އަޅުވައިފިއެވެ. ތިމަތިމާމެންގެ އަސްލަކީ ކޮބައިކަމެއް ވެސް ނުދަތެވެ.
އެހެނަސް، އަހަރެން ކަލޭގެ ސޫރަ ދެކެފީމެވެ. ކަލޭގެ އެންގުމާއި ދެއްކުމާއި އިއްވުމާއި ގުޅިލާމެހިއްޖައީމެވެ. ފިކުރާއި ވިސްނުމާ، ބުއްދިއާއި ދޭހަ ދަނެގެންފީމެވެ. ހުރި ރަނގަޅު ކަންކަން ދުރަށް ފޭކޮށް ޙައްޤަކާ ނުލައި އަނިޔާވެރި ބަސްތަކެއް ކަލެޔާ މެދު ބުނާކަށް ނެތީމެވެ. މަދަހަވެރީންނަށް ތަބާވެ ކަލޭގެ ނެތް ސިފަތަކުން ޚުޝާމަދުކުރާކަށް ވެސް ނެތީމެވެ.
މިސްރުގެ ހިރަފުސްބޯ ޖައްވުގައި ކަލޭ ހުރިއިރު، ކަލޭގެ އެހެންވެސް ދަރީންނެކޭ އެއްފަދައިން ހެދުނު ކަލޭގެ އުރުގައި އަހަރެން އޮތްއިރު، ހަވީރު ކަލޭގެ އުނގުގައި އޮތްއިރު، ނޭވާއަށް އުނދަގޫވާތީ އުޅުން ހަދާނެއް ނުވެއެވެ. ފޭރާންގަނޑު ކިލާވާތީ އުޅުން ހަދާނެއް ނުވެއެވެ. ރޯގާގެ ބޭހެއް ކެވުނު ހެނެއް ވެސް ހީއެއް ނުވެއެވެ.
އާއެކެވެ. ބާ ފޭރާމުގައި ހުރީތީ ޒުވާނުން ގަޔާނުވަނީއެވެ. އެކަމަކު ސަޤާފަތުގެ ފޮޓޯ ތަސްވީރުކޮށްދޭ ތަރިކައެއް ކަމުގައިވާތީ ކަލޭގެ ތިޔަ ފޭރާމުގައި ހުރުން އަހަރެންނަށް ހަމަ ހިތްގައިމުވަނީއެވެ.
ކަލޭގެ އިދާރީ ހިންގުމުން ދޯދިޔާކަން ދުށީމެވެ. ލަސްކަމާއި ޒަމާނާ ނުގުޅޭ ގޮތް ދުށީމެވެ. ބަޚްޝީޝަށް އަޅުވެތިވެފައިވާ ބައެއް މުވައްޒަފުން ވެސް ދުށީމެވެ. އެހެނަސް އެކަމުން އަހަރެން ކެތްތެރިކަން ދަސްކުރީމެވެ.
ކަލޭގެ ލިޔުން ލޮލުން ދުށީމެވެ. އެއީ ހަމަ ލޮލުގެ މިޔުޒިކެވެ. ކަލޭގެ ގޮވުން އަހަރެން އަޑު އެހީމެވެ. ހިތަށް ފަސޭހަ ރާގެކެވެ. ކަލޭގެ ބަސްތައް ވިސްނީމެވެ. ޙަޤީޤީ ސާފު މަންހަޖެކެވެ.
އެހެނަސް.....، އެހެނަސް ކަލޭ އެއްވެސް މީހަކަށް އެއްވެސް ކަމެއް މަޖުބޫރެއް ނުކުރަމެވެ. އެއީ ކަލޭގެ އުސޫލެއް ކަމުގައި ނުވާތީއެވެ. އިންސާނުންނަކީ މިނިވަނުންކަމުގައި ދެކޭތީއެވެ.
އެހެންވީމާ، ބަޔަކު މީހުން ދަމުން ކަލޭގެ ގޯތި ތެރޭން ކުނި ހޮވައިގެން ގެންގޮސް އެމީހުންގެ އަހުލުވެރީންނަށް ހަދިޔާކުރިޔަސް، ކަލޭގެ ރަށުން ދެމިފައިވާ ކޯރުން ފެން ފޮދެއްގެ ބަދަލުގައި ޖައްވުގެ ހިރަފުހުން އެމީހުންގެ ޢާއިލާތަކަށް ވެދުމާއިގެން ދިޔަސް، އެކަމުގައި ކަލޭގެ އޮތީ ކޮން ފާފައެއް ހެއްޔެވެ؟
ލިޔުއްވީ: ނަބީލް
އެއް ތައްޓަކީ ހުސް ތައްޓެކެވެ. ބޭރުގައި ހުރީ ފެހިކުލައިގެ ދަވާދު ލައިފައިކަމުން ބަލާލަން ކިތަންމެހާ ވެސް ރީއްޗެވެ. ނޫނެކެވެ. ކުލަ ތަންކޮޅެއް ގަދައެވެ.
އަނެއް ތަށިހުރީ ދަވާދުލައިފައެއް ނޫނެވެ. އެހެނަސް އެޔަށް ސިކާރަކޮށްލާފައި ހުރި ފެހިކަންގަދަ އާފަލަކުން ފެލާލި ދިޔައިގެ އަސަރުން ފޭދިފައިވާ ލޮލަށް ފިނިކަންދޭ މަޑު ފެހިކުލައެއް ތަށީގެ ބޭރުން ފެނެއެވެ.
ފުރަތަމަ ތަށީގައި މާ ބޮޑު ބޭނުމެއް އެކުލެވިފައިވާ ކަމަކަށް އަޅުގަނޑު ނުދެކެމެވެ. ތެދެކެވެ. ކުލައިގެ މައުރަޒެއްގައި ބަހައްޓާލަން އެންމެ ރަނގަޅެވެ. ކުލަތައް ވަކިކުރަން ދަސްކުރަން ފަށާ އުމުރުގެ ތުއްތު ކުދީންނަށް ކުޅޭ އެއްޗަކަށް ވެސް ރަނގަޅެވެ. އެކަމަކު މި ކަންކަމަށް ވެސް ރަނގަޅުވާނީ ދެވަނަ ތަށި ނޫން ބާވައޭ ހިތަށް އަރައެވެ.
މިވައްތަރު ތަށިތަށީގެ ބޭރުން ބަލާ މީހަކަށް އެތެރޭގައި ހުރީ ކޮން އެއްޗެއް ކަމެއް ނޭނގި އޮޅުން އަރާތަން ފަހަރުގައި އަޔަސް، އެތެރެ ހުސްކަން ފަޅާއެރުން އޮންނާނީ ހަމަ އެންމެ ގާތުގައެވެ. މި ކަހަލަ ތައްޓަކާއި މެދު މީގައި ފެހި ކުލަ ހުރީ ކީއްވެތޯ އެހެން ކުލައެއް ވެސް ހަމަ ޖައްސާލެވިދާނެ ނޫންތޯ ސުވާލުކޮށްލުމަކީ ވެސް މާބޮޑު މައްސަލައެއް ނޫނެވެ. އެހެނީ އޭގެ އެތެރެއަކާއި ބޭރަކާ ގުޅުމެއް ނެތެވެ. ކުލައެއް އަރުވާލަން ޖަހާފައި ހުރި ސަކަރާތެކެވެ. ހުސް ތައްޓެއްގައި ކޮންމެހެން ވަކިވައްތަރެއްގެ ދަވާދެއްލުން މުހިންމެއް ނޫނެވެ.
ދެވަނަ ތަށީގެ ބޭނުން ކިތަންމެހާ ވެސް ބޮޑެވެ. އޭގެ ރަހަ މީރުވާނެ ކަމާ މެދަކު ޝައްކެތް ނެތެވެ. އާފަލު ދެކެ ރުޅިއަރާ މީހަކު ވެސް އޭގެ ކުލަޔާ މެދު ސުވާލެއް ނުއުފައްދާނެއެވެ. އޭގައި ހުރީ އާފަލެއްގެ ދިޔަކަމާއި ބޭރަށް އައިސްފައި އެހުރީ އޭގެ އަސްލުން ފޭދުނު ކުލަކަމާއި ދަންނާނެއެވެ. އޭގެ ކުލައަކީ ކަހާލެވޭނެ ކުލައެއް ނޫންކަން ވެސް ޔަގީންކުރާނެއެވެ.
މިވައްތަރު ތަށިތަށީގެ ބޭރުން އޭގެ ޙަޤީޤަތް ހާމަވެފައި ހުންނައިރު، އޭގެ ކުލައަކީ އެތެރޭގައި ހުރި އެއްޗެއްގެ ނިޝާނެއްކަން، ނިޝާނަކީ އަސްލެއް ނޫންކަން، އަސްލެއްގެ ޢަލާމަތެއްކަން، އަސްލު ނެތިފައި ނިޝާނެއް ހުރުމުގެ މާނައެއް ނެތްކަން، އަސްލު އޮވެއްޖެ ނަމަ އޭގެ ނިޝާނެއް ހުރުމުގެ މުހިންމުކަން، ބުއްދީގެ އަހުލުވެރީން އިންކާރެއް ނުކުރާނެއެވެ.
މި ބާވަތުގެ ފުރިހަމަ ތައްޓެއް ޙަޤީޤަތް ބަލާލުމަށް އޮއްސާލެވުމުން.................................
ބިއްލޫރީގެ ފޭރާން ކަޝްފުކޮށްލެވުމުން..، އަސްތާ! ކަޅިތައް ހުއްޓިއްޖެއެވެ. ސަމާލުކަން ދެވިއްޖެއެވެ. ދެކަނަވައިން ސޮނިވެއްޓިއްޖެއެވެ.
އަސްލު ކުލައިގެ ރީތިކަން، ކުލައިގެ އަސްލު ރީތިކަން،
ކުލަ ހުންނަންވާނީ އަސްލުގައިކަން، އަސްލުގައި ކުލައެއް ނެތަމަ ކުލައެއް ނެތްކަން،
ކުލައަކީ ބޭރުން އެތެރެއަށް ލީކުވާ އެއްޗެއް ނޫންކަން، ކުލަވާނީ އެތެރެއިން ބޭރަށް ފޭދޭންކަން، އެނގިބަޔާންވެ ސާފުވެއްޖެއެވެ.
