ރަޙުމަތުގެ ފެން އާރު ފެންފަހިކޮށްދެމުން
ފެހިކުރަން "ދަނޑު އަޅުކަމުގެ" ދިރުވައިދެމުން

ރަޙުމަތާ މަޣްފިރަތު، ދިންނެވުމާއި ދޭ
އަހުރަވެތި ފިނި ރޯޅިތައް ޖައްސައިދެމުން

ޖައްނަތުގެ ދޮރުތައް ރިވެތި ހުޅުވައިދެމުން
ބަންދު ބޯޑު ޖަހައްނަމައި އަޅުވައިދެމުން

ދޭނުބައި ވަސްވާސްތައް ޝައިޠާނުތައް
ވޭނުގައި ޖައްސާށަ! ބިޑިއަޅުވައިދެމުން

ރޭރެއަށް ވުރެ މާބޮޑަށް މަތިވެރިވި މާތް
ރޭގަނޑެއް ހަދިޔާގެ ހަދިޔާކޮށްދެމުން

ހޯދުމަށް މި ލިބޭތަނުން ނޫޅެންޏަކާ
ރޯދިއެއް ނެތްކަން ދެނެއް އަންގައިދެމުން

އިހު ޒަމާންތަކުގައި މެކުނުހާ ހަޑިތަކުން
ޖެހުނުހާ ދަމިލައިގެ ލަށް ފިލުވައިދެމުން

ހެޔޮ ޢަމަލު ދޭ ޝަބުނަމުން އޮއްސައިދެމުން
ހެޔޮވެ ޠާހިރުވާނެ ގޮތް ދައްކައިދެމުން

ބާޣިޔަލް ޚައިރަށް އުފާވެރިކަން ދެމުން
ބާޣިޔަށްޝައްރުގެ ހިތަށް އަނިޔާދެމުން

ދީބު އަލިކުރި ނޫރު އިތުރަށް ވިދުވަމުން
މީރުވަސް ޤުރްއާން ގެނައި ، ފަތުރައިދެމުން

އަންނަނީ ރަމަޟާނު އަސްލު މި ފަންނުގައި
ދަންނަ މީހުން ހިތް އުފާކުރުވައިދެމުން

2006

މަގު އިޚްތިޔާރުކުރާ ހިސާބުން..

ފަހަތަށް ބަލަހައްޓައިގެންނުހުރެ ކުރިމަތީ ތަނަވަސްވެފައިވާ ރާސްތާއަށް ބަލާށެވެ.

ފަހަތަށް ކަރުއަނބުރައިގެން ހުރެ ހިނގަނިކޮށް ގަލެއްގައިއަޅައިގަނެދާނެއެވެ.

ނޫނީ ކުރިމަތީ އޮތް ރަންގަނޑަކަށް ފައިންއަރައިފައިވެސް ދެވިދާނެއެވެ.

އެހެނީ، ވަގުތުގެ މަގުގައި ފަހަތަށް އެންމެ ފިޔަވަޅެއްވެސް ނޭޅެއެވެ.

މާޒީގައި އެލިގަނެގެން ނޯންނާށެވެ. މުސްތަޤްބަލް ދިއްކޮށްލާ ފުރުސަތުގެ އަތުގައި ނުހިފިދާނެއެވެ.

މަގުދެކަފިވާ ހިސާބުން..

ނާކާމިޔާބީއެއްނެތެވެ. އެހެންޏާ ކާމިޔާބެކެވެ. އެހެންޏާ އިތުރު ތަޖުރިބާއެކެވެ.

އަލުން އެފިޔަވަޅުތަށް އެހެންގޮތަކަށް އަޅަން ލިބޭނެކަމުގެ އުންމީދަށް ހިތުގައި ބޭކާރު ޖާގަ ހުސްނުކުރާށެވެ.

މިއަދުގެ ވަގުތުު، އެ ފުރުސަތުދިނަސް، އިއްޔެ އެފެންއާރުން ފެންހިފައިގެން އަންނާކަށް ނޭންގޭނެއެވެ. ދަތުރަށް ބަރުވެދާނެތޯއްޗެކެވެ!

އެހެނީ، އިއްޔެ ތިބާއަކަށް މިއަދު ތިހުރި ހަނަފަސް ސަހަރާއިންލައިފައި ހިނގަންޖެހޭނެކަމެއް ނޭންގޭނެއެވެ.

ތިބާއަބަދުވެސް ގޮތްނިންމަނީ އޭރަކު ވެވެންއޮތް، އެނގިހުރި އެންމެ މޮޅުގޮތަށެވެ.

މަގުގައި ކާމިޔާބުލިބޭ ހިސާބުން..

ތިބާހުންނާނީ ހިއްމަތްކޮށްކޮށެވެ. ކާމިޔާބީ ހާސިލްވެ ދަތުރުނިމުން އެއީ އަދި އެހެންކަމެކެވެ

އެހެނީ، ހަގީގީ ނާކާމިޔާބަކީ، މި، މަގުހިނގުމުގައި ކުރަންޖެހޭ ހިއްމަތްކުރުމުގައި ތިބާ ނާކާމިޔާބުވުމެވެ.

ކަލާނގެ ބައްލަވާވޮޑިގެންވަނީ އަހަރެމެންގެ ނަތީޖާއަކަށް ނޫނެވެ. ތިބާ ކުރި ހިއްމަތަށެވެ.

އެކަލާނގެ ވަޙީކުރެއްވިއެވެ. "وَمَا تُقَدِّمُوا لأَنْفُسِكُمْ مِنْ خَيْرٍ تَجِدُوهُ عِنْدَ اللَّهِ إِنَّ اللَّهَ بِمَا تَعْمَلُونَ بَصِيرٌ "

މާނައީ: "ހެޔޮކަމުގެ ތެރެއިން ތިޔަބައިމީހުންގެ އަމިއްލަ نفس ތަކަށްޓަކައި ތިޔަބައިމީހުން އިސްކުޅަ ކޮންމެ

ކަމެއްގެ ثواب، اللَّه ގެ حضرة ގައި ތިޔަބައިމީހުންނަށް ފެންނަހުށްޓެވެ.

ހަމަކަށަވަރުން، اللَّه އީ، ތިޔަބައިމީހުން ކުރާކަންތައް މޮޅަށް ބައްލަވާވޮޑިގެންވާ ރަސްކަލާނގެއެވެ.."

(އަލްބަޤަރާ : 110)

މިބުނީ، ބަނދެވުމެއްގެ ވާހަކައެއްނޫނެވެ. ފަންނުވެރިކަމާ އުފެއްދުންތެރި ކަމައިގެން އުޑުތަކާއި ބިމުގައި ވާހާ ތަނެއްގައި ހިނގައި އުދިހިގަންނަންވީ ވާހަކައެވެ.