ދުނިޔެ ހެޔޮ މަގަށް އެޅޭނީ އިސްލާމީ ދުނިޔެ ހެޔޮމަގަށް އެޅިގެނެވެ. އިސްލާމީ ދުނިޔެ ހެޔޮމަގަށް އެޅޭނީ ޢަރަބި ދުނިޔެ ހެޔޮމަގަށް އެބުރިގެނެވެ. އެކަންކުރެވޭނީ މިޞްރު އޭގެ ޝަރަފާއި ޢިއްޒަތުގައި ފެނިގެނެވެ. ދަންނާށެވެ. މިޞްރަށް ކުޑައިމީސްކޮށް ނިކަމެތިކަމުގެ ބަސްރައްދުކުރާނަމަ، މިލިޔުން ކިޔައިލާށެވެ.
އަޅުގަނޑު މިޞްރު މީހުންނަށް ސަނާކިޔާ ކިޔުމުގެ މިސާލަކީ، ކަނު އަނދިރީގައި ހިގައިފައި ދަނިކޮށް ކުއްލިއަކަށް ހަނދު ފައުޅުވުމުން، އެހަނދަށް ސަނާކިޔުމުގެ ގޮތުން، އެހަނދާ މުޚާޠަބުކޮށް އަންނަނިވި ވާހަކަތައް ބުނި އަޢުރާބީގެ މިސާލެވެ. އޭނާ ބުންޏެވެ. "މާތްﷲ ތިބާ ރީތި ކުރެއްވިކަމަށް އަހުރެން ބުނެފިނަމަ، ދަންނާށެވެ. އެކަލާނގެ ތިބާ ރީތި ކުރެއްވިއެވެ. މާތްﷲ ތިބާ އުފުއްލެވިކަމަށް ބުނެފިނަމަ، ދަންނާށެވެ. މާތްﷲ ތިބާ އުފުއްލެވިއެވެ."
އޭ މިޞްރެވެ! އަހުރެންގެ ވާހަކަތައް ފަށާނީ ކިހާ ހިސާބަކުން ހެއްޔެވެ؟ އަހަރެން ވާހަކަދައްކާނީ ކިހިނަކުންހެއްޔެވެ؟ ބަސްބުނާނީ ކޮން ދުލަކުން ހެއްޔެވެ؟
މިޞްރުގެ ވާހަކަ ދައްކަން ފެށިއްޖެނަމަ، އަޅުގަނޑަށް ވަދެވޭނީ ތާރީޚުގެ އެންމެ ތަނަވަސް ދޮރާށީތަކުގެ ތެރެއިން ދޮރާއްޓަކުންނެވެ. މިޞްރުގެ ވާހަކަ ދައްކައިފިނަމަ، ދުނިޔެއާއި ޒަމާން އަޅުގަނޑަށް ތަރުޙީބު ދޭނެއެވެ. އަތްތިލަބަޑަ ޖަހާނެއެވެ.
އެމިޞްރުގެ ވެރި އިލާހަށް ކިޔަމަންތެރިވެގެންވާ މިޞްރެވެ. އަދި އެއިލާހަށް ސަޖިދަކޮށް ޚުޝޫޢަތްތެރިވި މިޞްރެވެ.
އެމިޞްރުގެ ވެރި އިލާހަށް ކިޔަމަންވުމުގެ ޝުޢޫރުތަކުން އެމިޞްރުގެ ހިތްތައް ފުރާލި މިޞްރެވެ. އަދި އެމިޞްރުގެ ލޭނާރު ތަކުގައި މާތްﷲގެ ނަބިއްޔާގެ ލޯބި ދައުރުކުރުވާ މިޞްރެވެ.
އޭ މިޞްރެވެ! ހިތްވަރުގަދަކަމުގެ ދުނިޔޭގައި ތިބާގެ ދައުރުވެއެވެ. އަދި ޤުރުބާނުގެ ދުނިޔޭގައި މަޤާމެއް ތިބާއަށް ވެއެވެ. ވިސްނުން ތޫނުކަމުގެ މަގުގައި ހަނދުމަ ނުނެތޭނެ ސިޔަރަތެއް ތިބާއަށް ލިބިފައިވެއެވެ.
މިޞްރު ރުހިގެންވާ ޙާލު އިސްލާމްދީން އެބިމަށް ވަނެވެ. ލޯތްބާއެކު މިޞްރުގެ ހިތަށް އިސްލާމްދީން ވެރިވިއެވެ. އަދި މިޞްރު މީހުން އެބައިމީހުންގެ އިލާހާމެދު ހަންހާރަވެތިކަމުގެ ޝުޢޫރުތައް އިސްކުރިއެވެ. އެކަލާނގެ ދީނުގެ ޙިމާޔަތުގައި ހަނގުރާމަކުރިއެވެ. އަދި އެކަލާނގެ ޝަރީޢަތް ޙިމާޔަތްކޮށް މަންހަޖު ފެތުރިއެވެ.
ދަރިވަރުން މުދައްރިސެއް ދެކެ، އަދި ބަޠަލުން އެބައިމީހުންގެ ޤާއިދަށް ލޯބިކުރާނެ އެންމެ ބޮޑު މިންވަރަށް މިޞުރުގެ އަހުލުވެރިން ސަލާމާއި ޞަލަވާތްލެއްވުނު މުޙައްމަދުގެފާނަށް ލޯބި ކުރިއެވެ.
އޭ މިޞްރެވެ. ބައެއް މީހުންނަށް މާތް ރަސޫލާ ގެނެސްދެއްވި އުޚުވަތްތެރިކަމުގެ ގުޅުން ހަމަ ނޭނގެނީއެވެ. އެގުޅުމުގެ އަގު ނުވެސް ދެނެގަނެވެނީއެވެ. މަޢާފުކުރާށެވެ!
އެމިޞްރުގެ ބޮޑު ޔުނިވަރސިޓީއަކަށް އެއުރެން ނުވަދެއެވެ. އެޔުނިވަރސިޓީއަކީ ޒަމާނުގެ ހުރިހާ ހެޔޮކަމަކާއި، އަދި މީހުން އުޅޭ ކޮންމެ ހިސާބެއްގައި ހުރި ކޮންމެ އިންސާނެއް، އެތަނުގެ ބައިވެރިއެއް ކަމުގައި ދުށް ޔުނިވަރސިޓީއެވެ. އެޔުނިވަރސިޓީއަކީ ތަޢައްޞުބާއި ނަފްރަތުގެ ހަތުރެކެވެ. އެއީ އެކުވެރިކަމާއި ލޯތްބާއި ރަޙުމަތުގެ ރަމްޒެކެވެ. އެއީ އިޚުލާޞްތެރިކަމުގެ އަޞްލެކެވެ. އާދޭހެވެ. މުސްލިމުންގެ ޢިލްމީ ޤިބުލަކަމުގައިވާ އަޒުހަރެވެ.
އޭ މިޞްރެވެ! މަޢާފުކުރާށެވެ! އަލިކުރުވަނިވި އަޒުހަރުގެ ބިމާއެވެ! އަދި ހިތްވަރުގަދަކަމާއި ފިދާވުމުގެ ބިމާއެވެ. ތޫނުފިލިކަމާއި ކުޅަދާނަކަމުގެ ބިމާއެވެ!
ތިބާގެ ޢާންމުންގެ ތެރޭގައި ސަނާ ޙައްޤު ނޫން މުޖުރިމުން ތިބިކަން އަހުރެން ދަންނަމެވެ. އެމަގުން އެއްވެސް ރައްޔިތެއް އިސްތިސްނާ ނުވާނެއެވެ. އެކަމަކު ހެޔޮ ޢަމަލުކޮށް ނަމާދުކުރާ ޞާލިޙު އަޅުވެރި ގިނަބަޔަކު ތިބާގެ ކިބައިގައި އެބަ ތިއްބެވެ. ސަލާމާއި ޞަލަވާތްލެއްވި ނަބިއްޔާއަށް ތަބާވެގެން މަޝްރިޤާއި މަޣުރިބުގައި ތިބިހައި ބަޔަކަށް ޝުކުރު އަދާކުރުމީ އަޅުގަނޑުގެ މައްޗަށް މިވަގުތު އޮތް ޙައްޤެކެވެ. މިޞްރުގަޔާއި އެހެން ތަންތަނުގައެވެ. އެތަނާއި މިތަނުގައެވެ. އަދާއި މާދަމައެވެ. އިއްޔެއާއި އިހެއްދުވަހުގައެވެ.
މިޞްރުގައި ނެތް ޢިލްމެއް ފަތުރަނީ ކޮން ޔުނިވަރސިޓީއެއްގައި ހެއްޔެވެ؟ އިންސާނުން އުޅޭ ތަނެއްގައި މިޞްރުގައި ނެތް ޢިލްމީ މުއައްސަސާއެއް އެބަ ހިގާ ހެއްޔެވެ؟ މިޞްރު މީހުންގެ ބުއްދިއާއި ފިކުރުން އެއުރެން ހިގައިފައިނުވަނީ، ޡަޤާފީ މަގުތަކުގެ ތެރެއިން ކޮން މަގެއްގައިހެއްޔެވެ؟
ހަނދުގެ ޞަޠަހައއަށް އެމެރިކާގެ ސެޓެލައިޓު ތިރިކުރީ ކަށަކުޅަދުންވަންތަ މާތްﷲގެ ޤުދުރަތްތެރިކަމުންނެވެ. އެއަށްފަހު މިޞްރު ސިކުނޑިއެއްގެ ސަބަބުންނެވެ. ދުނިޔޭގެ ޤާނޫނީ ކޮލެޖްތަކުގެ އެންމެ އިސް މަޤާމްތަކުގައި މިޞްރުގެ ޢިލްމުވެރިންނެވެ. ބޭސްވެރިކަމާއި ފަންނީކަންކަމުގެ އެންމެ އިސް ސަފުގައި މިޞްރުގެ ސިކުނޑިތަކެވެ. މިކަންކަމަށް އިންކާރުކުރާނީ ޙަސަދައިގެ ސަބަބުން ކަނުވެފައިވާ މީހެއް އެކަންޏެވެ.
މިއިން ވާހަކައަކަށް މީހެއްގެ ކިބައިން ޝުކުރުވެރިކަމެއް ލިބޭނެކަމަށް އަޅުގަނޑު އުންމީދެއް ނުކުރަމެވެ. އަޅުގަނޑު އެދެނީ ﷲގެ ކިބައިން މަތިވެރި ދަރުމައެވެ. ވަޠަނިއްޔަތުގެ މޮޔަކަމާއި ޤައުމަށް ލޯބިކުރުމުގެ މޮޔަކަން ޖެހިފައިވާ ބަޔަކަށް ރައްދު ދިނުމީ އަޅުގަނޑުގެ ބޭނުމެވެ. އިސްލާމީ އުޚުވަތްތެރިކަން އަގުކުރަން ނުދަންނަ ބަޔަކަށް ރައްދުދިނުމީ އަޅުގަނޑުގެ މަޤްޞަދެވެ.
މާތްﷲ ރުއްސުންލެއްވި ޢުމަރުގެފާނުގެ ޚިލާފަތުގައި މުސްލިމުންނަށް ތަދުމަޑުކަން ޖެހިއްޖެއެވެ. އެއަހަރަށް عام الرمادةގެ ނަން ދެވުނެވެ. މާނައީ ހަނަފަސްކަމުގެ އަހަރެވެ.
ޢުމަރުގެފާނު އެދުވަސްތަކުގައި ވިދާޅުވިއެވެ. ﷲގަންދެއްވައި ވިދާޅުވަމެވެ. މުސްލިމުންނަށް ކުރިމަތިވެފައިވާ މުޞީބާތުން ސަލާމަތް ވެއްޖައުމަށް ދާންދެން، ތިމަންކަލޭގެފާނު މަހެއް ބަޓަރެއް ފަރިއްނުކުޅުއްވާނަމެވެ. ފިކުރުފުޅު ބޮޑުވެ ހާސްވެވަޑައިގެންފައި ހުންނެވިއެވެ.
ޢުމަރުގެފާނުގެ ހަނދުމަފުޅަށް އެކަލޭގެފާނުގެ އަޚުންތަކެއް މިޞްރުގައި ތިބިކަމެވެ. އަދި މިޞްރަކީ ދީލަތި ބިމެއްކަން ހަނދުމަވެވަޑައިގަތެވެ. އެބިމުގެ ރަނގަޅު ތަކެތިންނާއި ދެރަތަކެތީން އެބިމުގެ އަހުލުވެރީން އެހީވާނެކަން ޔަޤީންވެވަޑައިގަތެވެ. އެހިނދު މިޞްރުގެ އަމީރަށް އެހީތެރިކަމަށް އެދިވަޑައިގެން ސިޓީއެއް ފޮނުއްވިއެވެ. މަދަދާއި އެހީ ލަސްވުމެއް ފަސްވުމެއްނެތި ނީލަ ކޯރުގެ އައްސޭރީން ލިބެން ފެށިއެވެ. މިއީ މިޞްރެވެ. މިއީ މިޞްރުގެ މާޒީއެވެ.
އިސްލާމީ އުންމަތް މަސީޙީންގެ ވަކިތަކުގެ ތެރެއަށް ގޮސް ނިކަމެތިކަމުގެ އަދަވަޅަކަށް ވެއްޓުނު ހިނދު، އިސްލާމީ ލަޝްކަރުތައް ރުކުރުވާލާ، އެލަޝްކަރުތައް ނުކުތީ މިޞްރުގެ ބިމުންނެވެ.
ތަތާރުން އިސްލާމީ އުންމަތުގެ އެތެރެއަށްވަދެ، ދުނިޔޭގެ ވެރިރަށްކަމުގައިވި ބަޣުދާދު ހަލާކުކޮށް ސުންނާފަތި ކޮށްލުމުން މިޞްރު މީހުން އިސްލާމީ ރަސްގެފާނު ޤުޠުޒުގެ ފަހަތުގައި ނުކުތް ހަނދާން މިއުންމަތް ނެތޭނެ ހެއްޔެވެ؟ ޢައިން ޖާލޫތުގެ ހަނގުރާމައިގެ ވާހަކަ އެއްޖީލުން އަނެއްޖީލަށް ފޯރުކޮށްދޭން ޖެހޭނެ ނޫންހެއްޔެވެ؟ އެދެވަހު މިޞްރުގެ މުސްލިމް ދަރިން ނުކުމެ ތަތާރުން އިދަޖައްސައިލިއެވެ. ތާރީޚުގައި ބަޔަކު އިދަޖެހިގެންދާނެ އެންމެ ނިކަމެތި ގޮތުގައެވެ. މިއީ މިޞްރުގެ މާޒީއެވެ.
ދަންނާށެވެ. މިޞްރަކީ ބަޠަލުންގެ ބިމެކެވެ. ޢިލްމުވެރިންނާއި ފަންނުވެރިންގެ ބިމެކެވެ. ޔުނިވަރސިޓީތަކާއި ކޮލެޖްތަކުގެ ބިމެކެވެ. ހަރުދަނާ މުވާޠިނުން ބިނާކުރާ ބިމެކެވެ. އެއީ އިންޤިލާބާއި ބަދަލުވުމުގެ ބިމެކެވެ. މާތްﷲ މިޞްރުގެ އަހުލުވެރިންނާއި މިޞްރު ރައްކާތެރިކުރައްވާށިއެވެ. އަދި އިސްލާމީ އުންމަ
March 28, 2011
މި ލިޔުން ކިޔާފައި ހިތަށް ފުން އަސަރުތަކެއް ކޮށްފި. މިޞްރުގެ އަލްއަޒްހަރު ޔުނިވަރުސިޓީއަކީ ހަމަ ގައިމުވެސް ޢިލްމީ މައިދާނުގައި ދިވެހިރާއްޖޭގެ ދަރިން ދުނިޔޭގެ އެހެން އެއްވެސް ތާކަށް ނުދަރާ ވަރަށް ދަރާފައިވާ ތަނެއް. އެހެންކަމުން މިކަމަށްޓަކައި ކޮންމެ ދިވެހި ދަރިއެއްވެސް އަޒްހަރުގެ ޒަމާންވީ މި އިޙްސާންތެރިކަން ހަނދުމަނައްތާލައިގެން ނުވާނެ. ދިވެހި ދައުލަތުގެ އެންމެ އިސް ވެރިޔާ ވެސް މި އިޙްސާންތެރިކަން ހަނދާންބަހައްޓަން ޖެހޭ. އަދިވެސް އަލްއަޒްހަރުގެ ދޮރޯށި އެހެރީ އިސްލާމީ އުއްމަތުގެ ހަމަ ކޮންމެ ދަރިޔަކަށްވެސްމެ އޭގެ ތަންމިނަށް ހުޅުވާލަދީފަ. އިންސާނީ ޙަޟާރަތްތަކާއި އިސްލާމީ ޙަޟާރަތުގެ އަސަރުން ތިމާގެ ޝަޚްޞިއްޔަތުގެ ސަގާފަތު މުއްސަނދިކޮށްލުމަށްޓަކައި މިޞްރުގެ ބިމަކީ ސަގާފަތުގެ ވަރަށް ވެސް އާރޯތާނާ ބިމެއް. ހަމައެހެންމެ އަލްއަޒްހަރަކީ އަހަރެމެން އެ އުއްމަތަކަށް ނިޞްބަތްވާ އިސްލާމީ އުއްމަތް އުފެއްދި މަތިވެރި ޙަޟާރަތުގެ އާސާރުތަކުގެ ތެރެއިން ދާރުލްއާސާރަށް ނުލައި އޮތް ދިރުންހުރި ހަމައެކަނި އިސްލާމީ އާސާރުކަމުގައި ބުނެވިދާނެ. އެހެންކަމުން މުސްލިމުންގެ ޙަޟާރަތު ކަޓުކޮށްލަން ވިސްނާ މީހަކު އެންމެ ފުރަތަމައިނުން އަލްއަޒްހަރާއި އެތަނުގެ ދަންނަބޭކަލުންނަށް ފުރައްސާރަކުރުމަކީ އޭނާއަށްޓަކައި ވަރަށް ފަހިކަމަކަށް ނޫނީ ނުވާނެ. ސަބަބަކީ އަލްއަޒްހަރު ރަމްޒުކޮށްދެނީ، މުސްލިމުންގެ ޙަޟާރަތް. އަދި މުސްލިމުންގެ ޢިލްމީ ކުރިއެރުމާއި ޢިލްމީ އިސްކަން. އަދި ޢިލްމު ފެތުރުމުގެ މެދުކެނޑުމެއް ނެތް ދިގު މާޒީ. އެހެންވީމަ އަލްއަޒްހަރާ މެދު ފަޚްރުވެރިވާނީ ހަމައެކަނި މިފަދަ ޤަދީމީ "އޮރިޖިނަލް" ޔުނިވަރުސިޓީން ކިޔެވި ދަރިވަރު އެކަންޏެއް ނޫން. ހަމަ ކޮންމެ މުސްލިމެއް ވެސް އެތަނާ މެދު ފަޚްރުވެރިވުން ޙައްޤު.
March 30, 2011
މިއީ " އޭ އަޒްހަރާއެވެ!" މިލިޔުން ފަދަ ޙަޤީޤަތް ހާމަކުރުމަށް މަސައްކަތް ކޮށްފައިވާ ލިޔުމެކެވެ. މިޞްރުގެ ވާހަކަ އަޅުގަނޑު ފަށާނީވެސް ފަހެ ކޮންހިސާބަކުން ހެއްޔެވެ. އަޅުގަނޑަކީ މިޞްރު މީހެއް އަދި އަލްއަޒްހަރުން ކިޔެވި މީހަކީމެއްނޫނެވެ. ނަމަވެސް ދުނިޔޭގެ އެކި ހިސާބުތަކަށް ވަރަށްގިނައިން ދަތުރުކުރާމީހަކީމެވެ. ތެދުތެދަށް ދަންނަވާނަމަ މާތްވެގެންވާ މައްކާއާއި، މާތް ނަބިއްޔުގެ މަދީނާ ފިޔަވައި އެތަނަކަށް އަދިވެސް ދާހިތްވާ އެފަދަބިމެއް މިސްރު ފިޔަވައި ނެތެވެ. އަލްޤުދުސްއަށް އަދި ނުދެވެއެވެ. މިސްރުގައިވާ ދަމާބާރަކީ ކޮބައިތޯ އަޅުގަނޑު ވިސްނީމެވެ. އެމީހުންނަކީ އާއްމުކޮށް ވަރަށް ސާދާ ދިރިއުޅުމެއް އުޅޭ ބައެކެވެ. ހަމަ ކޮންމެ ބައެއްގެތެރޭގައިވެސް ހުންނާނެ ވިޔާނުދާކަންތައްތަވެސް މިޞްރުގައިވެސް ހުރެއެވެ. ނަމަވެސް އަޑުއަހާށެވެ! މިޞްރުމީހުން ހިތްތިރިވާނެއެވެ. އިޖްތިމާޢީވާނެއެވެ. އަނެކުންނަށް އަޅާލާނެއެވެ. އަނެކާގެކިބައިން ބަދަލުހިފަން މަސައްކަތެއް ނުކުރާނެއެވެ. މާފަށް އެދުމުން މާފު ނުކުރުމަކީ އެމީހުންގާތު ވަރަށް ހުތުރު ކަމެކެވެ. އަނެކުން ބަނޑުހައިވެފައި ހުރިކަން އެނގި އޭނާބައިވެރިނުކޮށް އެމީހުން ނުކާނެއެވެ. އަޒްހަރުގެ ހާލަތާމެދު ވިސްނުމުން ހަމަ ހައިރާން ވާވަރު ވެއެވެ. އެތާނގައި ކިޔަވައިދެއްވަން އުޅުއްވަނީ އިސްލާމީ ޢިލްމުތަކުގައި އެންމެ ފުންނާބު އުސްބޭފުޅުންނެވެ. ޚާއްޞަކޮށް ދީނީ ފެކަލްޓީތަކުގައެވެ. އެމީހުންނަކީ ތަވާޟުޢުވެރިބައެކެވެ. ތަޢައްޞުބުން އެއްކިބާވެގެން އުޅޭބައެކެވެ. ވަކިފިކުރެއް ފަތުރަން މަސައްކަތް ކުރާބައެއް ނޫނެވެ. އެމީހުން ކިޔަވައިދެނީ ޢިލްމެވެ. ކަންއޮތް ގޮތެވެ. ޢިލްމުވެރިންގެ ރައުޔުތަކެވެ. އޭގެތެރެއިން ވަކޮގޮތެއް އިޚްތިޔާރުކުރާނީ ދަރިވަރެވެ. އެމީހުންގެ މައިގަނޑު މަސައްކަތަކީ އިސްލާމްދީނުގެ އަސާސީ އުސޫލުތައް އޭގެ އެންމެ ފުރިހަމަގޮތުގައި ހިފެހެއްޓުމަށް މަސައްކަތް ކުރުމެވެ. ލޮބުވެތި ނަބިއްޔު ވަޑައިގަތީ ތައުޙީދުގެ ތެދުމަގު މީސްތަކުންނަށް ދެއްކެވުމަށާއި، އިންސާނުން ދިރިއުޅެންވީ ފުރިހަމަ ނިޒާމެއް ދެއްކުވުމަށްކަން އަޒްހަރުގެ ޢިލްމުވެރިން ދަނެތެވެ. އިރާކުދަނޑިން ދަތް އުނގުޅުމަކީ މީސްތަކުންގެ މެދުގައި ޢަދުލުއިންސާފު ޤާއިމުކުރެއްވުމަށްވުރެ ބޮޑަށް އެކަލޭގެފާނު އިސްކަންދެއްވިކަމެއް ކަމަކަށް އަޒުހަރުގައި ކިޔަވައެއް ނުދެއެވެ. މިއަށްވުރެ ހައިރާންކުރުވަނިވި ކަމަކީ މިޞްރުމީހުންގެ އެ ސާދާ ދިރިއުޅުމާއެކުވެސް އަޒްހަރުގައި ހިލޭސާބަހަށް ހަމަ ކޮންމެ މުސްލިމަކަށްވެސް ކިޔަވައިދޭކަމެވެ. އެއަށްވުރެވެސް ހައިރާންކުރުވާ އަނެއްކަމަކީ އަޒްހަރުން ގްރެޖުއޭޓްވާ ކުދިން މިޞްރަށް ނުވަތަ އަޒްހަރަށް މަންފާކުރުވަނިވި ގޮތަކަށް ވަކި ޕްރޮޕެގަންޑާއެއް ފަތުރަން އަޒްހަރުން ނޭދޭކަމެވެ. އަޒްހަރުން ކިޔަވައިގެން ދާންވީއެވެ. އެމީހެއްގެ ޤައުމަށާއި އިސްލާމްދީނަށް ޚިދްމަތް ކުރަނިކޮށް އަޒްހަރަށް އެވީއެވެ. އަޒްހަރާމެދު ހިތްހަމަ ނުޖެހޭނަމަ އެކަންވެސް ކުރަންވީއެވެ. އަޒްހަރަށާއި މިޞްރަށް އެކަން ހަޖަމުކުރެވޭނެއެވެ. ކުރިއަށް އޮތްތަނުގައި މިހާރަށްވުރެވެސް މިޞްރު ރަނގަޅުވާނެކަމަށް ފެނެއެވެ. މިނިވަންކަމުގެ ވައިރޯޅި ޖެހެންފަށާފައިވާތީއެވެ.