ފޭރާއަކީ ގަބުޅި، ކާށި ހެހުމަށްޓަކައި ކުރެދި ފަދަ ތަކެތިން ހަދާފައި ހުންނަ އެއްޗެކެވެ. މިހުންނާނީ އެއްކޮޅު ބިމަށް ޖަހާފައި އަނެއްކޮޅު ފޭއްސާ ތޫނުކޮށްފައެވެ. މި ޒަމާނުގައި ފޭރާގެ ތޫނުކޮށްފައި ހުންނަ ކޮޅު ހަދާފައި ހުންނަނީ ދަނގަޑުންނެވެ.
ފުރޯ އަކީ ލަކުޑިގަނޑެއް ކޮށާމަށާ ވައްކޮށް އޭގެ އެއްކޮޅަށް ކައްޗަށް ވާ ގޮތަށް ތިލައެއް ލައްވާފައި އޮންނަ ހަތިޔާރެކެވެ. ގިނަ މީހުން މި ހަތިޔާރު ބޭނުންކުރަނީ ރުއްގަސް ކެނޑުމަށެވެ.
ކިރުނައިގެ އެއް މާނައަކީ ކަނބުރުގޭތަކުގައި ދަނގަނޑުތަޅާ އިރު ދަނގަޑު ގަނޑު ބޭއްވުމަށްޓަކައި ބިމަށް ވައްދާފައި ހުންނަ ދަނގަޑު ގަޑެވެ. މި ނޫން ގޮތްގޮތަށް ވެސް ކިރުނަ ހެދިފައި ހުރެއެވެ. (މާލޭ ބަހުރުވައިން މިއަށް ކިޔަނީ ކިރުނު) އެވެ.
މަށަންދައްޗޭ ކިޔަނީ ދަތްބަރިއެއްހެން ހުންނަ އެއްޗެއް ދަނޑިގަނޑެއްގެ އެއްކޮޅުގައި ހަރުކޮށްގެން ހަދާފައި ހުންނަ ހަތިޔާރަކަށެވެ. މަށަންދަތި ބޭނުންކުރެވެނީ އިލޮށިފައްޗަށް ނުކުޅަދާނަ ތަންތަނުން ކުނިކެހުމަށާއި ބިމުގެ ފަސްގަނޑު އެއްވަރުކުރުން ފަދަ ކަންކަމަށެވެ.
ކަތިވަޅިއޭ ކިޔެނީ އާދައިގެ ވަޅިއަށް ވުރެ ތަންކޮޅެއް ބޮޑުކޮށް ހަދާފައި ހުންނަ ވަޅިއަށެވެ. މި ވަޅި ހަދާފައި ހުންނަނީ ލަކުޑި މުއްގަނޑަކަށް ދަނގަޑު ތިލައެއް އިންދައިގެންނެވެ. ދަރުކޮށުން ފަދަ މަސައްކަތްތަކުގައި މީހުން ވަޅިއެއްގެ ގޮތުގައި އާއްމުކޮށް ބޭނުންކުރަނީ ކަތިވަޅިއެވެ.
ކަން މިހެން ހުރިއިރު ފުރޯ، ފޭރާ، މަށަންދަތި، ކިރުނަ، ކަތިވަޅި، މި ހުންނަނީކީ ކޮމްޕިޔުޓަރުގެ ޢާއިލާއާ ހަސަބަކުން ނަސަބަކުން ތިމާގެ ކަމެއް ކީއްކުރަން ރައްޓެހިކަމެއް ވެސް ހުރި އެއްޗެއްސެއް ނޫނެވެ. ދެން އަދި އިންޓަނެޓާ މި ތަކެއްޗާ ކޮން ބެހޭކަމެއްހެއްޔެވެ؟ ނަމަވެސް ...؟ ކޮމްޕިޔުޓަރުގެ ލޭގައި އިންޓަނެޓު ދައުރުކުރަން ފެށުމާއެކު، ކޮމްޕިޔުޓަރު ބަދަލުވެގެންދަނީ ހަމަ މަތީގައިވާ ތަސްވީރާއި ދާދި އެއްގޮތަށެވެ.
އިންޓަރނެޓް! އެއީ ފޭރާއެކެވެ. ނަފުސުގެ ވަށައިގެން ލެވިފައިވާ ޖާހިލިއްޔަތު އެ ފޭރާއިން ހެހޭށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަން އެ ފޭރާއަށް މެހުނަ ނުދޭށެވެ!
އިންޓަރނެޓް! އެއީ ފުރޯ އެކެވެ. އެ ފުރޯއިން އަހަރެމެންގައިވާ ދިގުވެގެންވާ ނާތަހުޒީބު ގުޅިގުޅިން ކަނޑާ ތިރިކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމުގައި އެ ފުރޯ އިން ނުޖަހާށެވެ!
އިންޓަރނެޓް! އެއީ ކިރުނައެކެވެ. އެ ކިރުނައިގެ މަތީގައި ކާފަރުންގެ ރޭވުންތައް ތަޅާ ފިސްކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަން އެ ކިރުނައިގެ މަތީ ނުބާއްވާށެވެ!
އިންޓަރނެޓް! އެއީ މަށަންދައްޗެކެޗެވެ. އެއިން ޚިޔާނާތާއި އަނިޔާވެރިކަމުގައި މަށަންދަތި އަޅާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމުގައި އެމަށަންދަތި ނާޅާށެވެ!
އިންޓަރނެޓް! އެއީ ކަތިވަޅިއެކެވެ. އެ ވަޅިން ތަރައްޤީ ގެ މަގުތައް ކޮށާ އަލިކުރާށެވެ!
ލޮލާއި ކަންފަތާ، ބުއްދީގެ ޢިއްފަތްތެރިކަމަށް އެ ވަޅިން ހަމަލާ ނުދޭށެވެ!
0 ޚިޔާލު!